Lalrinhlu Infimate : REV.THANGNGUR MUSIC AWARDEE 2022 Belchiengna

Nk.Lalrinhlu Infimate, Rev.Thangngur Music Awardee 2022 Saidan ICI KTP in Belchiengna/Inpawlpuina hun a nei chu Video a siem ania. lo en ve rawh.

CHANTAWKA LUNGAWI

 CHANTAWKA LUNGAWI

- Evan Chawngtuolur Changsan 

Ka thlaksamna thu hril chu ka ni nawh a, kei chu ieng ang khawmin um lang lungawi pei ka ching ta sih a. Philippi 4:11

Nikhat chuh,slum area (mi hnuoihnung deua umna biek) pakhat a hin ka fea, ringnawtuhai nipui Holi( color ni) an hmanglai tlangval ruol chu ka hmua, chu laia um mihriem hai chengna in chuh bawngin ang deu thawa ṭawp, mihriem chengna a?, ran in ti thei ding khawp hiel anih. Tlangval ruol chuh rawnga inthekhumin inhawi deuin hun an hmang ka hei hmu chuh ngaituona tamtak amin nei tir chu tie. Ringnawtu, mi hnuoihnung em em, mi nei angin a silpuon ṭha nei ve naw hai sienkhawm an phâk ang tawk le an chan ang tawka hlim taka hun an hmang kha inpâk um ka tiin ngaituona tamtak amin neitir chu tie!

 Ani ngei, mihriem pieng dan nung phung hih ei ena, hmel pieng dan le mizie danglam hran seng nei ei nia,  ei unau piengpui hai ngei le khawm ei mizie an ang ngai nawh. Chuongzing lai chun, mizie pakhat in ang na tlangpui ei neia, chu chuh ei thupuia ei hung ziek lang “chantawka lungawi” ti  hih a nih. Ei I hril nuom tak chuh ei miziea min thlawnpui rawp hlak tu “ chantawka lungawinawna ” inthawk iengtinam lungawina nei thei ei ta? Ti chu ei hril nuom a nih.

Tirko Paulain Philipi kohran hai kuomah a hrilna a chun hieng hin a tia, “ kei chu ieng ang khawmin um lang, lungawi pei ka ching ta sih a ” Tirko Paula hin ka lungawi tah tiin a hril nawa, lungawi pei ka ching ta sih a, a ti nih. Aumzie chu, chantawka lungawi dingin a nitin hringnun ah a thaw ṭal ṭal hlak a nih.

 Ei hril ta angin, mihriemin ei hringnuna harsatna ei tuok rawp hlak chu chantawka lungawina hih anih. Hi thumal “ lungawina ” hin ei mihriem nun hih ami sukvet hlaka, khawvel tienga ei mit enna ami sukvar peka, ei thlarau mit a mi suk del pek rawp hlak chuh a nih. Chu ei thlarau mit ami suk det pek hlak leiin ra ṭha naw tak a hung suok hlaka, suongkuo bufak a sukhnik nawa, hadam takin a min in tir ngai naw nih. Chau el chuh ni lovin, suongkuo hlim tak hlak khah, buoina thlipui a hung vuong luta, suongkuo lai inremnawna hung piengin, kohran ah te nei peiin, khawtlang ah a fepei hlak anih.

 Tirko Paula ang hin lungawi pei na nun hih nei inla chuh, a hranpa in revival hih ko ko ngai kher naw nih. Mani mimal nung ah revival um a ta, chappui a kang angin revival meipui a hung chawk suok ring aum. Chantawka lungawi hih thil harsa tak chuh anih, kei ngei khawm hih a châng hin chuh kei le kei khawm kan hnâm vâng vâng chang hih aum hlak, asan chuh ka chantawk a hin lungawi harsa ka ti ve hlaka,sienkhawm Pathien kuomah lungril taka ṭawngṭaina neiin lungawi dan hih kan chuk ṭawk ṭawk hlak anih.

 Chantâwka lungawina ei nei naw chun ei nun hih a hlim tak tak thei ngai nawa; mi ta inhnarin hun ei hmanga, inkhawm ah ei fe leh, ei sira inṭhunghai thuomhnaw man ei indawn chang bo lo, bazar ah ei fe leh ei nei naw sasa in mi thuomhnaw zawr ei bat, mani nina le inphuolo hiel in ei khawsaa, a tawp ah ṭapna le beidawngna ruom ah ei lûta, tulai chuh ka thlarau a ṭawl a nih tiin hun ei hmang hlak a nih. Ei bible a ei hmu angin, khawvel dân ( khawvel mawina) en lova, lungril thar nei dingin amin fuoi a nih.

 Ei lo ngaituo ve hlak diem? Korean hai hih changkângna tienga chuh khawvel I hril phak an kai hiela, chuonglaizing chun Korea film star ei I ngaisang le an nun phung ei entawn rawp hlak hai hringnun hih ei ena, ṭhenkhat chuh an piengtira an hmel tak ni talo hmelthar put tamtak an um a nih. An hmela khan an lung a awi zo nawa, khawvel thiemna hmangin hmel an suk danglam a nih.

 Ei ni lai khawm hieng anga hmel sukdanglam hih hmu ding an um zeu zeu, sum an neia an thawthei chun ei va sawisel ding lem chuh aum nawh, ei I hril tumtak chuh an piengtira an hmel put dana lungawi takin um hai sien chuh ei Pathien khawm a lungawi hle ring aum.

Tirko Paula bawkin, “ khawvela hin iengkhawm ei lutpui nawh a, iengkhawm ei suokpui thei naw bawk, nisienlakhawm, fak ding le sil ding neiin, chuonga chun lungawi ei tih.”  Hi lai thu hih zawm chuh intak hle’ng a tih, sienkhawm tum ṭal ṭal na nun nei a ngai anih. Chantawka lungawina famkim ei nei theina ding chun ei hringnun ah Isu Krista in Lal tir phawta, iengtik lai khawm ama le hringnun hmang kawp a pawimaw. Isu Krista le hringnun ei hmang kawp rawn naw chun lungawina ding hih a vâng hlak hrim anih. Chantawka lungawina lampui ṭhatak chuh Pathien thu a intuo ngheta, Isu Krista ei hma ṭhuoitu dinga fiel ngun a pawimaw. Pathien thlarauin mi umpui sien,ei chantawka lungawi taka ei um theina dingin Pathien ko hlak ei tiu.

**************************

Hla ngai thla rawh...

HRINGNUN HARSATNA

 

Ṭan ṭhat, tâwp ṭhat : 2 Chron. 24

Ṭan ṭhat, tâwp ṭhat
2 Chron. 24
- Pastor Dr. James R. Ruolngul
Thursday, 20th August, 2020

Juda lal Joas hi an lal ṭanin kum 7 mi chau a na. Jerusalema chun kum 40 zet an lal a nih. Enkaitu le enkawltu ṭha thiempu Jehoiada a um leiin Jehoiada dam sung po chu Joas hin Pathien mithmuah thil indikhai a thaw a.

            Ahab a leia Israel le Juda rama Baal biekna hung um leia LALPA in suksiet le râusana um khawm chu siemṭhat a lungrila. Mipuihai laiah thâwlâwm a dâwla, chuongchun, Pathien in chu an bâwl ṭhaa. A va thâw ṭha de aw.

            Jehoiada a hung upaa, a thi el taha. Enkâitu a nei ta naw leiin midanghai hungin Pathien nêkin anni râwl chu Joas chun a ngâi lem tah a. A pawi de aw! LALPA chu a nghatsana, Asera rawng a bâwl a. Pathienin zâwlneihai a tir khawmin an nghâwka, na an lo dâw nuom naw a. Thiempu Jehoiada naupa Zekaria khawm chu LALPA thu a khêkpui leiin Joas thupêkin an dêng hlum a.

            Hi lei hin LALPA Pathien chun Suria mihai chu a hung tir a. Tamtak an hung sukbohmanga, an râllâkhai chu Damaska (Suria hai khawpui) tieng an inphur a. Suria sipaihai tlâwmte chau hunghai sienkhawm, Juda sipai pâwl lientakhai chu an hung hnê ta pei a, Leviticus 26:7-8 a a hril kha a hung letling tawp el a nih. A tâwpa lem chu Joas hi a siehlaw ngêiin a phierrûka, a khum chungah thatin a um hiel.

 1. Joas anga enkawltu amani, enkâitu amani, nu le pa amani an um sung po ṭhaa, an um nâw chara mani nuom dân dâna um, puitling thei lo, hril le inchûktir zing ngâi, mani kea ngîr tum lo Kristien hi ei va tam awm de ti ka ngaituo chu tie. Kohranah nisien, khawtlânga khawm nisien, hieng ang mi hi an buoithlâka, innghatna tlâk an ni ngâi nawh. Ringtu ṭha chu mani khât chaua an um pha leh an ropuina le nina an lang tak tak hlak a nih.

 2. Joas ang bawka mi ṭhatna hre nuom loa, mani hmasiel khawm hi ei um ve el âwm de. Enkawltu, nu le pa, le Bible mi’n chûktirna hre nuom loa, ruol le pâihai ngâidân ngâina lemtu, khawvêl inhawina le hîpna tienga lungril pe hi thil pawi a nih.

 3. Kohran le Kristien nuna khawm, piengthar hun laia hlim raka, hun sâwtnâwte hnunga nasataka hnungtawl nâwk nghâl khawm hi ei tam hlak.

Hi ei hang hrilhaia inthawk hin Kristienhai hi ei inenfie rawp a va ṭûl de aw. A bul ṭan ṭha raka, a tâwp tieng zûvâ deu deu hi thil pawi a ni ding a nih. Nu le pa, hotu le mi enkâitu mihriem an um naw khawma vana Pathien hin a mi hmu zing a ni leiin, ei khawsak dan nisien, ei hringnun khala khawm hin ringumna le indikna hi ei vawng zing nuom a um bawk. Kristien nun indik chu a bul a ṭha ang bawkin a tâwp khawm a ṭha ding a nih.

 Do kâng zing ngâi Kristien ei ni chun, ei innghatna a ṭha nawh tina a nih. Chu ang bawk chun, mi hîpna tieng tienga tlu duol duolhai hi tui anga det nâw an ni bawk a. Chuleiin, vawisûn hin, mani seng hang inngâituo inla: ieng foundation a innghat am ei na – ei ngâidan foundation am, boruok foundation am Isu Krista ah?

***************************************

Hla ngai thla rawh a hnuoia mi a hin..

Lalhmunmawi - Ṭhangpuitu nang naw chu

TLANG CHU A UM DING ANI NAWH

-Pu.Lalminawn, Pavânglai C-in-C

 Tarik 08-02-2015 (Pathienni) zing inkhawm ṭin in Chanchinṭha Var Editor Board members inza um tak hai Tv.Jefesi le Tv.James Shakum hai in Article ziek ve ding le a thupui ding khawm 2015 Board Exam hmasuon mek hai ta dinga CHONA tieng nisien an la ti nawk deu deu a. Hi ariticle ziektu hi Lal David in, “Aw Lalpa Pathien tu am ka na, ka sung hai tu ha’m an na, hi chen chen hi I mi ṭhuoi” alo ti ang deu in CHONA tieng article ziek ding chun kan sit hle a nih. Abraham Lincoln school kai sung po po bel khawm in thla 13 vêl chau a nih, an ti angin keikhawm ka school kai sung po po bel khawm in mi thupuilo deu niin kan hriet. Kan chûk sung hun tawite sung khan tumru taka ka lo beive na zarin, hma ka sawn hle a. Subject siemtu hai hi kei ka ang anga mihriem ve anni leiin tiema hriet ve ngei ngei dingin kan ring ve tlat hlak. A vangduoia siemin Tarsis lawng ṭiket (ticket) la lo cut ve leiin, kan chûkna chu a hung mumal thei tanaw a, ngapuiin a mi dawl a, vapanga ami’n luok dawk nawk hlau a tuhin chu Pathien zârin ka dam ve ṭawk ṭawk niin kan hriet.
   

 Awleh!! A bik takin class X le XII exam ding mêk hai... Napoleon sipai haiin râldo dinga an suok sup sup laiin an hmaa tlâng insângtak a lo um leiin, râl do thei loin an hung kîra. Napoleon in chu thu chu a hriet chun “TLÂNG CHU A UM DING A NI NAWH” tiin bawngtuthlaw le hmangruo dang dang hai le a sipai le a rawihai chu ṭhuoiiin tlânga chun lampui an siem tah a. Thiltheilo (impossible) ti hi mi invêt hai diksawnari chau ah a um a lo ti hiel an ti chuh! In subject siemtu hai kha nang a ang bawka mihriem annia, thluok (brain) anei lien biek chuong nawh. An hun tamlem lekhatiemna’n an hmang râwn ve lei a nih. Hlawtlingna chang ding chun rinum tamtak tuor a ngai a nih, ti hriet a pawimaw hle.William Shakespeare chun “ ROSE PÂRMAWI TAK LO DING CHUN HLING TAMTAK KARA KUT RAWL A NGAI”  a lo ti hi hrezingin eiin chûkna, sinthawna, le fâk zawngna le dang dang hai hin tumruna le tuorselna hi neia bei ṭal ṭal hi hlawtlingna bulpui a nih. Exam ding hai po po ditsakna vochuom insângtak kan hlan cheu.
   

 Ka lawm ie!! Chanchinṭha Var damsawt raw seh!!

Tuiṭhalam, 15th Feb 2015

Puon var sil a leng hai (EDITORIAL)

Hieng puonvar sil hai hi tuhai am annia?

Hla ziektu (Poet) pakhat chun khawvela cheng mêk ringtu hai hi Ramțha nawk zuol beseia hringnun hmang seng ei nih, tiin a hril. A ti ang hrimin Isu Krista zuitu hai chun hi khawvel a hin chu besei ding tak tak einei naw a, ei beisei tak chu Van Jerusalem thara ei Lalpa Pathien, ropuitaka eilan tuokpuina hmun ding “Ramțha” lem chu a nih. Hlaphuoktu chun  “Krista zarin Beseina Hring ka nei”, tiin a lo phuok ta bawka. Thil tamtak a kawk niin anlang.

Khawvel ei cheng sung hin mi tuelkhawm hin Beseina ei nei hlaka. A țhen chun khawvel hausakna, hriselna, sungkuo inhawi, thuom le fak hnienghnar taka um, mi inlâr le thilthaw thei tak, le a dang dang hril seng el lo ding beiseina einei hlaka. Amiruokchu hieng beiseina hai popo hin mi țhuoiin eilo hmu/chang ani khawma, lawmna, hlimna, dittawkna hi anmi pêk ngainaw leiin, ei beiseina kha beiseina teplo el an cang hlak.

Isu Krista sandamna inhretu chun khawvel  hi a in an nawh ti hrein, rinumna le harsatna a tuok châng khawmin “Hi khawvel hi chu ka châm sawngna ding annaw a, ka khuolzinna ram chau a nih” tiin an thlamuon thei lem hlak. Isu Krista chun khawvel in a theida cheu chun lawm lem ro, khawvel mi inni si nawh a, tiin khawvel le inchelrem lo dingin a nauhai an fui lem.
Isu Krista ngei khawm khawvela a châm sungin hrilsietna hrilseng lo, harsatna tiem seng lo, thlêmna mihriem I do ruol ding lo, hnengdena hai khawm a dawng ani ti ei Bible ah hmu theiin a um bawk a, ama ngei khawm khawvelin a theida a nih. Khawvel sandamtu dinga hung khawvelin a theida!! Nisienkhawm a hmangai êm êm mihriem hai sandamna sin chu Kraws chenin muolpho takin a tuor muolsuo a, nang le keiin sandamna chu changin Vanram, Pathien angsunga eilût thei nawk hlau lem ani tah.

Vanram ei tlungpha chun, khawvel a harsatna nasatak kara Pathien țan tlata chanchințha thedar tu hai chu hnena puonvar silin ropuiin anla leng ding a nih. Chuong puonvar sil a leng hai laia ei țhangve theina dingin Krista lungpui chunga innghat kohran hai hin bei fan fan ei tiu…!!

  -CR   

Bible Study: CHANCHINTHA LEIA PAULA LAWMNA (I Timothe 1:12-20)

                                       -Rev.Rosung Sinate
“ Pathien lunginsietna chanchintha chun chun sin a thaw takzet a nih ti tarlangtu thatak chu Paula hringnun hi a nih. Paula chanchin ei tiem pha hin Pathien lunginsietna le a sandamna thilthawtheina makzie ei hrietchieng thei a nih. “
  
 Paula’n Pathien kuoma lawmthu a hril tawp thei nawna san ni rawp hlak chu Pathien zangaina le lunginsietna leia sandamna a chang chau ni lova rawngbawltua a ruot lei hi a nih. Hieng thumal pahni, “zangaina” ti le “lunginsietna” tihai hin umzie inthuktak annei ve ve a. Paula chun Krista a hriet nawh a, a awi naw bawk a. Chu chau chu ni lovin Krista awitu, Lama mihai suknawmnatu, thattu hiel khawm a nih. Chuonga Krista ringtuhai chunga nunrawng taka a um lai khawm chun Pathienin a hrem el nawh a, a suol ang huin a thungrul ve nawh a, zangai takin a hla hram hram pei a nih. Paula chunga hin Pathien za a ngai chau khawm an nawh a, ‘a lunginsietna’ a suklang zing a nih. Hi taka “lunginsietna” ti hi ‘phulo hmangaina’ ei ti ang hi a nih. Sikula zirtirtuhaiin an naupang hai examnaa pass zo lohai lunginsietna mark (Grace mark) an pek belsaa anin pass tir ang an nawh a. Zirtirtuhai chun lunginsietna mark an pekhai chu examnaa pass vâng dâm, nungchang tha le kai taima dam, damnaw leia tlingzo naw deu dâm anni hlak a. Paula ruok hi chu chuong ang chu a ni ve nawh a. Kohran (Krista taksa) a sawisak a, ringtuhai a kal a, Pathien kal zawnga thil a thaw zing lai khawm nisien Pathien lunginsietna zara sandamin a um a, a rawngbawltu dingin a thlang/ruot tawp el a nih.
    Chuleiin, Paula hin Krista rawngbawltu ni ding chun tlaklo le tling loin inngai sien khawm, Pathienin tling le ringumah ngaiin a rawngbawltu dingin a ruot el hi lawm hril thei ruol loin a lawm a, Pathien lunginsietna chu ringna le Krista Isu  hmangainain a luongliem niin a hril a nih.
“ Krista Isu mi suolhai sandam dingin khawvela hin a hung ti thu hi chanchintha tluontling a huop vawng a nih. Sandamna thilthawtheinain a huop senglo khawpa misuol an um ngai nawh. Isu Krista chu khawvela umdan tha min entir le min chuktir ding le mi neka tha lema um dinga mi cho ding ringawta hung a ni nawh a, sandamna, chatuon hringna mi pe dinga hung a ni lem. (I Timothe 1:15-16)
Paula hin misuolhai laia a suol tak angin a’n hril a,Pathien lunginsietna a hriet zuol po leh a suolzie an hrietchieng zuol pei a nih. Kristien hringnun chu inngaitlawmna le lawmnain a pâr suok hlak a nih. Hieng lâwm lâwma Pathien zangaina le lunginsietna Paula chunga an lang hi mi tam takin Pathien an la hung awi theina dinga suklangna a nih.
   
Paula’n a chunga Pathien zangaina ropuizie le a lunginsietna nasat ziehai a hei ngaituoin mi suoltak khawma sandamna a chang chau  ni loin a rawngbawltua a hang ruot el dâm a hang hriet hin Pathien inpâk le chawimawiin, “Laltak chatuona um, se theilo, hmu theilo Pathien tak chau chu chatuona chawimawi le ropuiin um raw se. Amen” tiin a khek suok a nih. Pathienin inlalna, chatuon mi nina suol le se theilo a ni zie le hmu thei a ni naw zie, ama chau chu Pathien indik tak ani zie a puong suok a nih. Eini khawm ei chunga Pathien zangaina le a lunginsietna nasatzie ei ngaituo chângin Pathien chawimawiin ei khêk suok hlak am?
  
 Timothe hi upahaiin a chunga kut innghata rawngbawl dinga an sietum lai khan mi thenkhatin a thilpêk le hratna thuhai an lo hril a. Hi thu hin Timothe hi a rawngbawl sung po po a sukhrat niin an lang a. Chuong thilpêk le hrâtna hmang chun rawng a bawl a. Krista a ringna chu chel tlatin sie le tha hrietna inthiengtak chu pawm tlat dingin Paula’n an fui thar a nih. Mi tamtak chun sie le tha hrietna intheingtak hi ngaithain an phûrna le châk zâwng tieng an fe leiin ringna indiktak chu an fe kawisan hlak a nih. Chu hai lai chun Humenai le Alexander khawm an thang ve a nih. Sie le tha hrietna intheintak hi ei ngaitha chun ei lungril a ngar deu deu a, a tâwpa lem chu suol le tha khawm thlier theilo khawpin ei chawlawl thei a nih.
Pathien le ei lêng hmunkhat hin ei sie le tha inthieng takah Pathienin a mi biek hlak a, a suol le a tha, an dik le an diknaw a mi hril hlak. Ei sie le tha hrietna inthiengtak anga thil ei thaw pei hin ei ngaituona a  fie deu deu hlak a nih.
Alexander le Humenai hai hi Pathien hrilsietnaw an inchûk theina dingin Paula’n “Setan ka pêk”tiin a hril a. Hi taka “Setan ka pêk” ti hi Kohran inpâwlkhawmnaa inthawka bân tina a nih. Tulai kohranin Dân bawsiehai dân puoah ei sie ang hi a nih. Hieng ang thununna hi an pil sawngna dinga hremna a ni nawh a, an suksuolna sim a, an insiemthat theina dinga kohranin thununna a pêk thei insângtak chu a nih. Tulaia kohranin thunnuna dân a neihai hi ei ngaitha naw ding a nih.

26th January 2014, ChancinthaVar News

Editorial:

                                        BEISEINA

    Mihriem hringnun hi nitin el hin “beiseina” hin a mi thuoi vel a, chu beiseina ngei el chu hmatieng ke min pen tirtu ngei el chu a lo nih. Beiseina neilo chun  hmatieng ke ei pen hrat ding angin a hrat thei ngai nawh , ama hringnun ngei khawm suksiet a nuom hiel hlak, in sukhlum hiel nuomna lungril khawm a hung hring suok hlak bawk.
 

Chuong ang bawk chun Kohran hai hin hmatieng a ke ei pen hrat theina dinga ei beiseina innghatna chu Kohran Thuoitu hai hi an nih. Kohran mipui hai beiseina ang Thuoitu hai hin an phak naw chun thil pawi tak ni ngei a tih. Chu Beiseina ngei el chu thuoitu haiin ei mipui hai ei siem pek naw chun, ei kohran chu ei thiek ning a tih. Kohran mipui hai endawng thuoitu ei lo nita el thei bawk. Mi thenkhat chun “kan kohran tnuoitu hai entawn tlak ani nawh” an ti hlak, chuong ang mi hai chun beiseina ding an Kohran haiin an hmu nawh tina anih. chuong nilo ding chun Thuoitu hai hi fimkhur takin hmatien ke pen pei ei tiu.
 

Kohran mipui hai khawmin Beiseina an mi siempek chun, chu ei beiseina kawnga chun lawm ei tiu, chu beiseina ngei el chu ei dam khawsuok na ding a sirbi pawimaw em em el chu a nih.

Chachin Lawrkhawm

*    Pu Lalbelsa hai chun tulai hin an in thar rawng nalna an nei mek a, hun sawt naw te hnunga an hluo ta ding thu ei lo dawng.

*    Zanita inthawk ta khan NSSU Tuithaphai Presbytery Conference chu Saikawt ‘N’ ah nei mêk ania. Zani zân khan department thenkhat hai chun inruolsiekna hun an lo nei tah a, vawisun khawm hin la nei sunzawm nawk an tih.

*    Saidan Pastor Biel awptu pastor ding, Pastor.Thangroliana le a sung hai chun liemtah Nilaini khan Kwarter anlo hung hluo tah. Ei pastor thar hi Pherzawl anthawka hi lai hmuna hung transfer a nih.

*    Pu.Peter Lalditsak le Pro- Pastor Ramsiemthar Joute hai chun hung tlung ding thawlenni hin an Posting na ding hmun lo pan tang an tih. Pro-pastor Ramsiemthar hi Phuaibuang, Mizoram ah posting a ta, Pu.Peter Tryte ruok hi chu Tripura Mission Field sunga um, Kisong Standard School ah thawk ding ti a nih. Tawngtaina'n hre tlat hlak ei tiu.

*    Vawisun Sunde skul subject lak zo ani char hin, I Samuel 1-3 sung Test exam nei ning a tih.

*    Pu. Chalkung Nu le Upa Lalhminglien Nu hai khawm tulai hin taksa bawrsawmna in a tlak buok mek a, ei tawngtaina hai a san ei tiu.

*    Tv.Mathew chu Upa Evan John Camp neina hnuoia Umrangsuo, Assam ah Counsellor dingin Ningani khan a lo liem suk ve ti thu eilo dawng. Camp hlawtlintak an hmang ngei ei beisei pui.